2016(e)ko martxoaren 30(a), asteazkena

Abbadiaren sekretua

Abbadiaren sekretua Fernando Morillok idatzitako beste eleberri bat dugu… Abentura eta misterioa gogoko badituzu, dagoeneko zure agendan gogokoenen artean behar luke idazle honek.
Istorioaren lehen orriak hemen

Gauzak nola diren, eleberriaren proiektua sariketa batera aurkeztu zuen, eta sari gisa, Hendaiako Nekatoenean egonaldi bat egiteko aukera izan zuen, eleberria osatzeko astia alegia. Bitxikeria gehiago jakiteko, hemen.

Eta bertatik gertu, oso gertu, Anton Abadia izan zenaren gaztelua dago, Hendaiako itsaslabarraren gainean, Santa Ana muturraren eta Ondarraitz hondartzaren ondoan. 1860 urte aldera eraiki arazi zuen, eta Europa osoko astronomi behatoki bakarra antolatu zuen bertan, apala, baina garai hartarako ikaragarria. Horretaz gain, hamalau hizkuntza gutxienez ezagutzen zituela badakigu, eta euskalzale amorratua izanik, Lore Jokoekin lotzea ezinbestekoa da.

Horixe da Alar eta Kaietek aiton-amonen etxera joandakoan topatu duten eskenatokia. Amonak aspalditik egina du gaztelua zaintzeko zina, eta bertatik itzultzen ez dela ikusita, bila joan zaizkionean, jendarmeekin egin dute topo. Gauza arraro gehiegi, eta tartean, Fatima eta Publio, aintzinako ezagunak, maitasun kontuak tarteko, harreman arraro xamarrak dituztenak. Abentura nola garatzen den, eta misterioa argitzen ote den jakiteko, Abbadiaren sekretua zerorrek deskubritzea onena. 

Zer da gehien harritu zaituena?

2016(e)ko martxoaren 28(a), astelehena

Infernuko arrosak

Lurralde ezkutuko detektibeen bigarren lana dugu hau, Fernando Morillok San Mameseko zonbia aurkeztu zigun talde berarena. Oraingoan, Donostiako deabru baten aurka aritu beharko dute zonbiak eta bere lagunek, emakume dotore batek babesa behar duela esan baitie. Babesa, bai, deabru-eme batek gauero larrosa beltz bat uzten baitio gau-mahaian… Zenbaitetan ispiluen atzetik begiratzuen duen emakume-deabrua.

Poliziarekin hitz egiten saiatua zen, baina barre egin, eta psikiatrarenera joateko aholkatu zioten; hark ere gauza bera pentsatu omen zuen, baina bisitak ederki kobratu zizkion… Zuen duintasun apurraz gerturatu zen Ezezagunaren Ikerketa Agentziara… eta froga gisa, hiur larrosa beltz utzi zizkien. Emakumeak bulegotik aldegin orduko, garbi zuten… Infernuko larrosak ziren haiek, eta gaia, beraz, arriskutsuegia. Baina fakturei aurre egin behar eta…

Tira, bihotz ugari nahaspilatuko dira istorio honetan, baina ezin gehiago kontatu… Irakurtzen baduzue, barre pixka bat egingo duzue, ziur izan!
Gozatzen hasteko, hemen dituzue istorioaren lehen orrialdeak...
Kontatuko al diguzu zein den zure pasarterik gogokoena?

Maripuzker

Istorioa irakurtzen erraza, oso erraza… lehen irakurleentzako aproposa, motza izateaz gain, dibertigarria ere badelako. Baina lotsarazten gaituzten puzkerrez haratago, badu ipuinek sarri izan ohi duten irakaspena: inoren lepotik barre egitea puzkerrak botatzea baino itsusiagoa dela alegia.

Mitxel Murua zarauztarra dugu, eta marrazkilaria, berriz, Mattin handia…. Haien lanari esker, irribarrea marraztuko zaizu ziur. Iruñeko Hizkuntza Eskolan ere gauza bera pentsatu omen zuten, eta hizkuntzetan trebatzeko duten Raibabel irratian Euskara ikasten bigarren mailan zebilen talde batek honako grabaketa jaso zuen.

Gustatuko zaizuelakoan!!

2016(e)ko martxoaren 26(a), larunbata

Laranja bat zaborretan

Patxi Zubizarretak berak itzuli zuen Ibrahim jauna eta Koranaren loreak, eta bertako pasarte motz batek ematen dio istorioari sarrera:

Toki pobre edo aberats batean ote zauden jakiteko, begiratu zakarrontziei. Zikinkeriaren ordez zakarrontziak ikusiz gero, oso inguru aberatsa den seinale. Zakarrontziena alboan zikinkeria ikusiz gero, ez pobre ez aberats izango da: turistikoa, horixe. Zikinkeria zakarrontzirik gabe ikusiz gero, pobrea derrigorrean. Eta jendea zikinkeria artean bizi baldin bada, oso-oso pobrea izango da.

Mayorga dramaturgoari jaso zion Patxi Zubizarretak sortzaileak adi egon beharra daukala, jaso egin beharra daukala zarata, munduko zarata, kutsadura eta kiratsa… eta alkimia berezi baten bitartez bihurtu behar dituela poesia, musika… eta amets. Beharbada hori da laranjak irudikatzen duena, zaborretatik Karabinok atera duen laranja horixe baita.


Ahozko literaturak ere badu lekurik istorio honetan, kultura desberdinetan maiz jaso izan baititugu istorioak belaunaldiz-belaunaldi, eta ahoz-aho… qr koderen bat topatuko duzu orrien artean, eta horiek baliatuz, pasarte batzutan irakurle ez baina, entzule bilakatuko zara, Al-Qaraba nekropolian ipuin kontalari baten ondora iritsiko baitzara Karabino ameslariaren eskutik. 




2016(e)ko martxoaren 24(a), osteguna

Eskubeltz taldearen abenturak

Lagun talde bat: Eskubeltz taldea. Detektibe lanetan primerakoak, apartak! Eta zu haiekin batera Sherlocken pareko izan zaitezen gonbidatzen zaituzte orriz-orri, lau misterio desberdin argitzeko moduan izan zaitezen: Etxe Misteriotsua, Kastoreen lakuko altxorra, Trafikarien tunela eta Lapurreta zooan. 


Detektibetzarako zure trebetasunak neurtu nahi badituzu, liburu paregabea duzu hau, dibertigarri eta desberdina: orrialde batean irakurri, eta albokoan, irudian, behatu, aztertu, eta aztarnak topatu. Zenbat eta erantzun gehiago asmatu, orduan eta hobeak izango dira, zalantzarik gabe, zure detektibe lanak.


Maletatxo baten bila dabiltza… 

Non uste zuen Felixek zegoela maletatxoa?

2016(e)ko martxoaren 23(a), asteazkena

Gezurrezko natura hila

Ingridek 16 urte beteko dituenean IPada eskatu du, baina amak aspaldi esan zion gauza batek horrelakorik ez duela jasoko pentsarazten dio: 16 urte bete zituenean berari oparitu zioten gauza bera jasoko du berak ere, etxeko ohitura zahar bati jarraiki… 
Bere birramona Carmen Beltranen eguneroko zaharkituak garai bateko emakume baten grina eta borroken berri emango dio, eta baita bere burua balioesteko beste modu bat irakatsiko ere. Ingridek bere pintura zaletasuna Jacoborekin partekatuko du, hori, eta baita askoz gauza gehiago ere… Garai bateko emakumeek gizonezkoentzako gordea zen munduan izandako zailtasunak agerian uzten dizkigun istorio honek, emakume eta gizon ezagun askoren istorioak ditu atzean, oraindik, gaurdaino, ezezagun ere badiren istorio asko….

2016(e)ko martxoaren 21(a), astelehena

Ottoline eskolara doa

Lehenago Chris Riddellen liburuak harribitxiak zirela aipatu genuen, Ottoline eta kateme horia irakurri genuenean. Estiloa berbera, marrazki ederrez ondutako liburua… 
Ottoline ez da sekula eskolara joan, eta Cecily Forbes-Lawrence III.a ezagutu duenean, eta honek tea zeinen ederki zurrupatzen duen harrituta ikusi duenean, berak ere Dohain Berezidun Umeentzako Alice B. Smith Ikastetxera joan nahi duela erabaki du. Munroe jaunak lagunduko du, noski, nahiz eta Cecilyk ez duen gehiegi maite… baina hori beste istorio bat da… Egia esan, Munroe jaunak ere ez du Cecily gehiegi maite, baina hori zergatik den jakiteko, ikastetxera lagundu beharko dituzu. Armairuko artzaren laguntzaz maleta egin… eta bide on! Ottolinek bere dohain berezia zein den topatu beharko du, eta Munroe jaunaren laguntza ezinbesteko izango zaio.

2016(e)ko martxoaren 19(a), larunbata

Jara Bartzelonan

Bartzelonara joan zaigu Jara, aitaren lan kontuak direla eta. Eta Ihintza ikaragarri ongi moldatuko zela badakien arren, berari asko kosta zaio hiri handira moldatzea. Txiki sentitzen da, oso txiki, eta babesa askotan bakardadeak baino ez dio eskeiniko. Izan ere, lagunak egin artean, ikastetxean liburuen artean edota komunean sentituko da babestuta, berarekin inor sartzen ez den tokian. Bakardadea desberdina da bakarrik zaudenean, jendez inguratutako bakardadea da gaizki sentiarazten zaituena. Pentsamolde horiek buruan, Laiak komunean harrapatu du Jara… eta halako batean, ausartu da galdera egiten.. Tira.. ile-apaindegira joan nahi, baina batere ezagutzen ez duenez, aholkurik? … Laiak berehala ulertu du, eta hiri handiko lehen laguna egiteaz batera, mundu berria deskubritzen lagunduko dio Jarari…

2016(e)ko martxoaren 9(a), asteazkena

Piramide gorria

Piramide gorriak Egiptoraino eraman gaitu… Baina istorioa Rosetta Harriaren inguruan hasiko da, Londreseko British Museum ederrean. Rosetta Harria harribitxi bat dela esaten badugu, diamante eta zafirotan pentsatuko duzu ziurrenik, baina ez du horrekin inolako zerikusirik… Harribitxia bada, ieroglifikoak irakurtzeko aukera eskeini zigulako da. 

Julius Kane arkeologo handiak hitzordu bat du haren ondoan, baina gauzak ez dira uste bezala irtengo, eta Carter eta Sadie seme-alabek ihes egin beharko dute, Eguberri eguna inolaz ere imagina ezin zuten moduan pasako dutelarik.

Imagina itzazu o hizkiaz amaitzen den edozein janari gustoko duen Khufu babuino litxarreroa, Muffin katu kuriosoa, edota Filipo Mazedoniako krokodilo albinoa… eta deabruak askatu dituen Jaun gorria…

Imaginatzeko esatea erraza da… baina arrazoi duzu, irudimen handia behar da… Dibertigarriagoa da irakurri eta guztiarekin gozatzea! Primeran pasako duzu! Ziur!
Zein da gehien gustatu zaizun pasartea?

2016(e)ko martxoaren 2(a), asteazkena

Luxoreko misterioa

Arte ikertzaile bilakatu zaigun familiaren bigarren oporraldiak dira hauek, Egipto aldera oraingoan. Piramide tzar horiek nola eraiki zituzten, egiptoarren jakintza mundua bera, aspalditik dira misterio ulergaitza, eta akaso horrek ere egiten du erakargarri lurralde hura. Bestela nola ulertu zerua goian eta norabide guztietan basamortua baino ez dagoen lurralde hura ezagutzeko grina?
Beroak estutzen zaituenean, zail da behar bezala atseden hartu eta pentsatzea.

Egipton oraindik ere misterio gehiago argitu beharko ditu familia berezi honek. Eta… Faraoien madarikazioa zein den ez badakizu, Egiptora bidaia egin aurretik, Luxorreko misterioa irakurtzea komeni zaizu.