2015(e)ko abendua 30, asteazkena

Fairy Oak II. Iluntasunaren lilura

Fairy Oak, Berdelau harana, lurralde harrigarria da, ederra, edonor gustora bizi daitekeen horietarikoa. Magiadunak Magiagabeekin bizi dira, pozik, eta haurrak maitagarriek zaintzen dituzte, hegan egiten dakiten maitagarri txikiek. Feli da gure narratzailea.

Banilla eta Pervinca, Babu eta Vi, bikiak dira, eta sekula halakorik gertatu ez den arren, haien ahalmenak desberdinak dira, lehena Argiaren Sorgin delako, eta bigarrena berriz, Iluntasunarena. Vi ausartagoa da, edo arriskuei beldur gutxiago die, ezin jakin… Baina amesgaizto bat izaten du sarri, inori kontatu nahi ez diona, eta bahitua izateko zorian ere izan da. Bahitua? 

21eko Ikaragarria erasoan dabil, Etsaia, inoiz baino bortitzago: Iluntasunaren Jaunak horixe nahi du, iluntasunezko mundu bat, eta horretarako Argia deuseztu behar… Horra zergatik dituen begiz jota bikiak, orekaren islada ezhoikoa direlako.
Lasaitasuna amaitu da Fairy Oaken. 

Iluntasunaren lilurak baditu, istorio honetaz gain, bestelako ezustekoak: Ipuinen ordua maite dute neskatoek, Aintzinako Liburua irakurtzen ikaragarri ongi pasatzen dute, eta akaso bertan topatuko dituzu barre eginaraziko dizuten pasarte dibertigarrienak. Marrazkiez gozatzeko berriz, Babu eta Viren magia koadernoak kolore bizitan (Witch gogoraraziko dizute, ziurrenik, idazlea bera baita). Liburu batean, beraz, bi liburu, bi koaderno, eta istorio mordoxka.

Eta amaieran… Susmo bat… Hirugarren libururako gonbidapena, zalantzarik gabe. Banilla ala Pervinca… zein duzu gustokoen? 

2015(e)ko abendua 29, asteartea

Anne Franken egunkaria

lehen orrialdeak hemen irakurgai
Zail da hamahiru-hamalau urteko neskato batek idatzia dela sinestea… Baina berak Kittyri behin baino gehiagotan idatzia zion egunen batean kazetari ospetsu edota idazle izan nahi zuela, eta are gehiago, ez zuela etxekoandre bakarrik izan nahi, etorkizunean izena eta izana nahi zituela… 

Neskato izatetik, emakume izatera; berak ere udaberria maiteago du negua baino… eta ernetze hori, bere beste-ni hori deskubritzeak bizipoza eta segurtasuna emango dizkio, baina baita galdera mordo baten erantzunen bila jardun beharra ere.
Bizirauteko aukera duenak, ba ote du kexatzeko eskubiderik? Beldurra, konfidantza, bizitza uneoro jokoan… eta ortzemuga askatasunaren deiadar.

Garai baten lekukotza bortitza, edonongo eta edonolako pentsamoldeak izatea pertsona izatea, izatea bera baino garrantzitsuago ezin duela izan isiltasun gorrotagarrian ohiukatzea…  Horixe da Anne Franken egunkaria.

Eta isiltasun horretan, hitzek ihes egin behar dutelako, sentitzen dena adierazteko beharra ukaezina delako, liburuetan jasotako hitzek, jakintzak, ideiek… eta baita idatzietan pentsamentu eta sentimenduak biltzen dituzten hitzek ere, berebiziko garrantzia izango dute. Hitza benetan ahaltsua delako.

Anne Frankek, eta Jarak adibidez, zer dute antzeko, zer desberdin? 
Zergatik bilakatu ote da Anne Franken egunkaria klasiko? 
Zer du Gazte Literaturatik, eta zer Literatura Unibertsaletik?

2015(e)ko abendua 28, astelehena

Dumitru

lehen orrialdeak hemen irakurgai
Izena arrotz egingo zaizu akaso… baina Dumitruk euskaraz egiten du, euskalduna da hitzez eta bizitzez, aitak sorterria utzi eta Euskal Herria hautatu zuenez bizitza berria egiteko. Itxuraz herri lasaia bada ere, gizarte honek oraindik baditu aurreiritzi ugari, eta Dumitruri zail izango zaio haiei ihes egitea.

Errumaniarra izatea ez da lapur izatearen sinonimo, baina zoritxarrez, Dumitruri hori hala dela frogatzea egokituko zaio… Minez, baita amorruz, aitak Fiul meu este basc, dar dacă bascii o să-l trateze rău, prefer sa fie român! garrasi egingo du ertzaintzarenean. Musikak bihotzak hunkitzen dituelako akaso, edota krisiak guztiok pixka bat berdindu gaituelako, Dumitruk desherriaren gazi-gozoak ezagutuko ditu… arrain txikiak ur handitan ibiltzen ikasi behar duen gisan.
Topikoez ari garela esango al zenuke?  

2015(e)ko abendua 27, igandea

Berrian, gaur...

Horixe nahi genuke guk ere… Liburuak izan ditzazuela opari, eta liburuak opari ditzazuela... Liburuak elkar-trukatzean bizipenak, emozioak, pentsamenduak eta geure-geure diren zatitxoak ere oparitzen ditugulako.
Liburu bat oparitzen dugunean, beste pertsona horrengan pixka bat pentsatzen dugulako nahitaez: bere gustuak zein diren, halakorik ezagutuko ote duen, ezustean harrapatu, eta orrialdeetan barrena galduko ote den… Eta liburu bat uzten dugunean, berriz, guk bizitakoak ere orrien artean badoazelako, hitzekin batean mataza bilakaturik; liburu batek gordetzen duen istorioa, gure historiaren parte bilakatzen da oharkabean, eta horixe partekatzeak, are gehiago, partekatu nahi izateak, badu bere xarma.

2015(e)ko abendua 26, larunbata

Inork ikusi ezin duena

Greyson New Yorkera bizitzera joan berri da, ospitaletik gertuago egoteko; begietako ebakuntza egin diote, itsua baitzen, eta orain maiztasunez joan behar du, pixkanaka bista berreskuratzeko prozesua nola ematen den zaintzeko.

Medikuari zerbait kontatu behar diola uste du Greysonek: noizean behin, bere baitatik atera, eta denboran hutsuneak sortuz, ikusmenak ikusten ez duena baina aurrikus dezakeena eskeintzen dio. Hilketa baten berri izan du, eta poliziarengana jotzen du, bere froga bakarra ikuspen psikikoak badira ere. Hilketa bat… edo gehiago… Uste baino korapilatsuagoa izango da istorioa, eta nahi baino arrisku latzagoak ezagutuko ditu.

Irakurtzen duzun artean ezin susmatuko duzu zein den istorioaren mataza askatzeko haria, eta amaierak benetan harrituko zaitu. Ausartuko al zara istorioarentzako beste amaiera bat asmatzen?

2015(e)ko abendua 24, osteguna

Eguberria

Eguberri eguna kristauen jai izateaz gain, gure kulturara zabaldu den festa ere bada, tradizioekin nahastuz, tradizio bilakatuta… Eguberriak norberaren bizipenekin osatzen ditugu, famili giroan, aspaldiko ohiturei erreparatuz, natura, kontakizunak eta pasadizuak uztartuz… Hori guztia ere badira gure Eguberria, eta halaxe jaso dute, ezin era poetikoagoan, Juan Kruz Igerabide idazleak eta Elena Odriozola ilustratzaileak.

Belaunaldi desberdinak elkartzen gaituen festa giro honek, ahozkotasuna du ardatz, kantak, ohiturak, istorioen eta historiaren kontakizuna. Horrexegatik hautatu dugu istoriolari guztioi bihotzez opatzeko

2015(e)ko abendua 22, asteartea

Ulysses Moore 7. Hiri ezkutua


Mioli jostari dabil, egunotan katua kuku-gordeka jolastu nahiean dabilela dirudi… Annaren ama Veneziako Zirriborro Etxean ari da zaharberritze lanetan, eta Morice Moreauren lanen artean Ptolomeo topatu du Annak, sekretu handi baten zaindari.

1909ko liburuxka bat, bitxia, Bidaia Hiltzen ari den Herrira izenburuduna.

Istorio honi buruz hizketan jardun eta, Marrazki bizidunak aipatzen badizkizugu, pistak ematen baino gehiago, despistera jolasten ari garela pentsa zenezake… Eskerrak Tomasso aztarnak topatzen trebea den: Ulysses Mooreren Kilmore Cove gogoratu du, Denboraren Ateak gordetzen dituen hiri desagertu hura...

Ahazturiko hizkuntzen hiztegia behar dute Hiri ezkutua aurkitzeko, inon hiri ezkuturik bada… Hiztegi batentzako izen erakargarria, bere baitan misterioak gordetzen dituela pentsarazten diguna… eta Malarius Voynich, artean, muturtuta.

Zein da zure ustez istorio honetako pasarterik zirraragarriena? Zergatik?

pd: jarraituko du...

2015(e)ko abendua 18, ostirala

Hegoak

Norbaitek liburu bat uzten dizunean, oharkabean opari bat ere egiten dizu… Gustatuko zaizu… eta irribarre bat.

Hori da Hegoak
Azalari jaramonik egin gabe, mamiaren bila sartu, eta orrialdeetan barrena, istorio-anabasa batean murgiltzeko aukera izango duzu. Fantasiaren mugetan paseatuko zara Laurelekin batean, eta inolako aurreiritzirik gabe bidaiatzeko gonbidapena onartzen baduzu, magia, intriga, misterioa, maltzurkeria eta maitasun istorioak biziko dituzu. Izan ere, dena ez da ezagutzen dugun bezalakoa...

Davidek garbi esan zion Laureli:
       ...gauza asko daude nik ikusi ez ditudanak, eta horrek ez du esan nahi existitzen ez direnik. -Hasperentxo bat egin zuen-. Egunero ari naiz hori ikasten.

2015(e)ko abendua 16, asteazkena

Asmatu nor naizen

Micheleren bizkar-zorroan gutun bat. Asmatu nor naizen. Aurkitu ni. Eta ezagutu.

Eta Michelek, jakin-minak jota, nori erantzun jakin ez eta, arbelean letra handiz idatziko du erantzuna, irakurri behar duenak irakur dezan.

     "Asmatu-nor-naizen Aurkitu-ni Ezagutu" andereñoak erantzunik nahi badu,
hori nola egin esateko eskatzen diot.
                        Sinatuta: Mutil oso-oso jatorra.

Micheleri gustatu zaio jolasa, misterioaz gain, hitzen balioa tarteko dagoelako ere bai: papera jasotzean, bata zein bestea ohartu dira, ez dute xehetasunik galdu nahi, begiak tinko paperean, hitzetan, mezua bera nola bukatuko den jakin nahian. Horixe da istorio honen xarma, zu ere hitzetan harrapatuko zaituena, Micheleren eta beste auskalo nor horren arteko hitz gurutzatuetan ezkutatzen den zerbait hori deskubritzeko grinaz. Hitz idatziek ez dute zaratarik ateratzen, irakurri eta berrirakurri egiten dira, garden ageri dira begiratzean, lerro artean ere araka daiteke agian dauden gauzak ikusteko, edo beharbada ez daudenak, baina ez du minik egiten haiek imajinatzeko jolasean jolastean. Eta jakin-minez besterik ez bada ere, azkeneraino heltzen da, ustekaberen bat espero delako. Idazten badut, azken batean, badakit entzun egiten didazula.

2015(e)ko abendua 12, larunbata

Leo eta elurretako ibilaldi zoragarria

Erregaliz taldearen abentura honetan, batzutan taldea ez dela beti talde gisa portatzen deskubrituko dute Fanny, Leo, Dotte eta Mayak. Beti batera egongo zirela hitzeman zioten elkarri, baina handituz goazen heinean, denbora tarteak beste batzuekin ere elkarbanatu nahi izaten ditugu, eta hori ulertzea ez da beti xamurra izaten.

Elurra bota du, elurte polita, eta irakasleak ostiral eta larunbaterako irteera antolatu die, leratan ibiltzera.

Lagunen arteko tirabirak elurretan utziko al dituzte? Maitasun kontuak tarteko, Nikolasek ere badu zeresanik… 

Istorioaren amaieran, Erregaliz zaleontzako oparia: maitasun kontuetan nola jokatzen duzun, nolakoa zaren jakiteko, test erraza. 

Zure jokaera Erregaliz taldeko norenarekin identifikatu duzu?

2015(e)ko abendua 11, ostirala

San Ferminetan, Lesakan

Liburuaren azala liburu bat irakurri ala ez erabakitzeko baliatzen baduzu, kontuz! Izenburu oso erakargarria du Anduezaren lan honek, festa giroa irudikatuko duzu ziur… Baina tranpa hutsa da!

Donostiako Bilintx institutua. 2013ko abendua. DBH4 E gelan fauna galanta bildu da, tribu guztiak, nahiago baduzu: apatxeak, txerokiak, komantxeak, txeieneak, moikanoak, payuak… Lucky Luke eta Daltondarrak baino ez dira falta. Iskanbila, istilua, nahasmendua, zalaparta, liskarra, atralaka, nahaste-borrastea, zarata, burrunba eta purrustadak uneoro, guztiak batera. Nola ados jarri 4. maila amaierako bidaia antolatzeko? Zer egin dirua biltzeko?

Maitasun kontuak, whatsapp mezuak eta Zea Mays, Berri Txarrak eta Gatiburen kantak topatuko dituzu Bukowsky-Tribuaren istorio berri honetan. Zu ere tribu honetako partaide al zara? Ez da txantxa! John Anduezak, idazleak berak, liburua irakurri eta whatsappez zure iritzia emateko aukera ematen dizu. 

2015(e)ko abendua 10, osteguna

Bat Pat. Troll buruhandiak

Urratsak arrastaka eta marmarak… 
Errudunak?

Izaki basatiak dira, handiak eta iletsuak, mendiko haitzulo handietan edo itsas bazterrean bizi direnak. Ile luzea daukate, sudur luzea eta oso aho handia. Esku-oinetan launa atzamar besterik ez daukate. Oso igerilari onak dira eta asko gustatzen zaie haragi gordina. Normalean, gizakiengandik urrun egoten dira, baina noizean behin, ikusminak eta goseak bultzaturik, etxeetara hurbiltzen dira zelatatzera edo lapurtzera. Baina lainoa dagoenean baino ez…

Aspaldiko kondairak dira… baina, kondairek egia nolabait azaltzen dute, ez?

Bidaia berri honetan, Bat Patek lagun bereziak egingo ditu… Bai, batek Txoritxo Polita izenaz bataiatu du, eta beste batek, sakuzarra deitu! Trollfjord uharteko haitzulo sakonean ezkutatzen diren arriskuetatik ihes egiteko taktika berriak probatu beharko dituzte, eta talde lana funtsezkoa da, zalantzarik gabe! Hitzez kontatzen dizutena irudikatzen saiatzen bazara, barrez lehertzeko arriskua duzu.

Izakia horiei buruz entzungo zenuen ziur noiz edo noiz… Nurrek ere ezagutu ditu, baina ezin jakin berdin-berdinak diren, ala haien artean arraza desberdinak ere badiren… Irudimena hain da boteretsu!
Zuk nolakoak direla entzun duzu?

2015(e)ko abendua 9, asteazkena

Nur eta haize-arrosa


Nurrek bere urtebetetzea Larrabetzun pasako du aurten… eta bai, opari handi-handi bat jasoko du etxean, baina, irudia ikusita, ezin asmatuko duzue zer den.

Nurrek bere lagunak deitu ditu, eta haiekin ere bere urtebetetzea-bis ospatuko du amamaren laguntzaz… Izan ere, urtean behin bada ere, urtebetetzea nahi denean ospa daiteke, ez? Bada, makarroiak, eta arrautza-irinetan pasatako oilasko paparrak patatekin jan ostean, imagina ezin duzun abentura biziko dute Nur eta bere lagunek.

Bidaiatzeko, elur-lera, haize-arrosa, mapa bat… eta irudimena baino ez dituzte beharko… Berokiak ez ahaztu, han, iparburuan, hotz egiten baitu!

Aitonak garai bateko jolasak gogoratu ditu, bai al dakizu zergatik? Oparirik ederrena zein da, zure ustez? Ah! Eta Jotnär bat zer den bai al dakizu? Eta Gauerdiko eguzkia? Eta ipar-argiak?

2015(e)ko abendua 8, asteartea

Skaterrak III. Begia begi truk

Hemen sakatuz gero, lehen kapitulua irakurgai
Itzela!
Hiriaren modernotasuna erakargarri delakoan, arte garaikidearen museo aurrean skater taldea ageri da iragarki batean. Baina badakizu, iragarkiak ez dira normalean errealitatearen ispilu, alderantziz, gure interesen arabera itxuraldatu ohi dute egia. Berehala jabetuko dira horretaz Imanol, Adrian, Mai, Anyo eta As.

Baina Imanolek beste gauza bat deskubrituko du, eta larrutik ordainduko gainera: gure hitzen esklabu garela berandu baino lehen.

Uda iritsi berritan, ordu gutxiren buruan plan guztiak pikutara joango zaizkie, baina lagunek edozer egingo dute ikasturte osoan zehar izerditu duten oporraldia berreskuratzeko, eta, batez ere, lagunik onenak direla demostratzeko. Aurreiritziak, endreduak, misterioa eta historia biltzen dira Mikel Valverderen istorio honetan… Amaierara iritsi arte korapilo askatu nahian edukiko zaitu. 

Zer da korapiloan gehien trabatu zaituen haria?
Nola askatu den gustatu al zaizu?

2015(e)ko abendua 7, astelehena

Ada Goth eta Ilargi Hilaren jaialdia


Ada Gothen bigarren istorioa dugu hau, Ilargi Hilaren Jaialdia. Antolaketa dela eta, denak ikaragarri lanpetuta dabiltza, eta Ada bera nahiko bakarti sentitzen da. Ganbarako Klub sekretuan bere kezka guztiak azaldu nahi zituen, baina hori ere bertan behera utzi diote…

Ilunpe Jauregian sukaldari onenek dute hitzordua, Gozogintza Lehiaketa Handia dela eta, eta margolaririk bikainenek ere bertan egin dute topo. Sukaldeko artisten eta margolarien izenekin, baita beraien lanenekin ere, barre dexente egingo duzu, askok ezkutuko esanahiren bat gordetzen baitute.

Arte erreferentziaz jositako liburua duzu hau, Hartz-eme baten biografia opari dakarkizuna… Marylebone hobeto ezagutzeko aukera ezin hobea.

Chris Riddellen beste lan bat ere jaso genuen duela gutxi, Ottoline eta kateme horia, eta haren marrazkiei erreparatzeko biziki gomendatu genizun. Oraingo honetan, opari, bere weborrirako deia… Bai, inglesez dagoela badakigu, baina bertako altxor txiki ugari, liburuan bezala, marrazkietan ezkutatzen dira, eta marrazkia, badakizu, hizkuntza unibertsala da. Gozatu!
Emilyk esaten duen moduan… Bai zirraragarria! Egiazko margolari bat sortzen ikustea!

Eta zuri, zer da liburu honetan gehien gustatu zaizuna?

haurliteraturaretoa.eus

Durangoko Azokan, Saguganbaran saltseatzeko tarterik hartu baduzue, gaurko ekitaldi honen berri izango duzue, ziur. Gaur bertan, ordubete exkax barru, Berbaro taldeak sortutako webgune zoragarria aurkeztuko dute, haur eta ez hain haurren gozamenerako. Irailetik martxan bada ere, Durangoko Azokan bere tartea topatu du Haur Literatura Aretoak.

Helburua: Guk dugun bera, euskal gaztetxoen artean irakurzaletasuna sustatzea, eta gurean ditugun lan ederren aurkezpenak egitea. Zer irakurri ez badakizu, hemen topatuko duzu gustukorik ziur.



2015(e)ko abendua 6, igandea

New Yorkeko misterioa

Arte ikertzaileek misterio berria dute eskuartean… 
Oraingoan, New Yorken, edozer gauza gerta daitekeen hirian.

Osaba Williamek gauzak kasualitatez ez direla gertatzen azalduko die, baina hori baino gehiago jakin nahi baduzu, bere azalpenak irakurri beharko dituzu.

Hortik aurrera…
Arte-lanak lapurtzen ari diren gaizkileak haien planak burutzeko zeinen artista izan daitezkeen deskubrituko duzu gure familia xelebre honekin batera. Istorioan sartuz gero, egoera imaginatuz gero, zirrara sortuko dizute hainbat pasartek, eta baita, akaso, hotzikararen bat ere…

Zein izan da gehien harritu zaituen pasartea? 
Istorioak suspentsea ongi mantentzen duela iruditu al zaizu?

2015(e)ko abendua 5, larunbata

Gizajo baten egunkaria IV. Egun zakurrak

Udako oporrak. Amak ahaztezinak izan daitezen nahi du… Baina Greg eta amak desberdin irudikatzen dituzte bi hilabete hauek, ziurrenik etxe guztietan gertatu ohi den legez.

Gregek ileapaindegia txutxumutxuak zabaltzeko toki aparta dela deskubrituko du, eta sarriago joatea ez legokeela gaizki pentsatzera heldu da… Amak Super Irakurzaleen Kluba sortu du, eta Greg, zerbait irakurtzekotan, txutxumutxu aldizkarietan gauza interesgarrien bila ibiliko zaigu. Hala jakin zuen Ipar Amerika urak hartuta egongo dela sei hilabete barru.. eta horrek lasaitu ederra eman dio, datorren urtena nota onak ateratzeko presioa gainetik kendu baitio. Horiek dira Gregen burutazioak… 

Tira… ezin hemen bere egunkariko pasarte guztiak kontatu, guztiak xelebre xamarrak badira ere… 

Zein da zuen gustukoena?

Nur eta alfonbra hegalaria

Bidaia berri honetan, Nur bere familia ezagutzera joan zaigu Damasko hirira… Izan ere, baba Siriarra du. Bai, baba bere aita da.

Baina, senitartekoak ezagutzeaz batera, hiri ederra ere ezagutuko du, eta Zokoa behin eta berriz bisitatzeko aukeren bila jardungo da. Izan ere, Nur ezagutzen baduzu, badakizu istorioak oso maite dituela, sormen handiko neskatoa dela, eta misterioak ez dauden tokian berak segituan antzematen dituela. 

Alfonbra hegalari bat… imaginatzen? 
Bada… Nurrek bai… 
Eta Damaskoko zokoan barrena, alfonbra hegalari bati buruz Yasminaren istorioak ikaragarri hunkituko du.
Zuk ere egin dezakezu hegaz, Nur eta zure irudimenaren laguntzaz… 

Istorioarentzako amaiera berri asmatzen ausartuko al zinateke?

2015(e)ko abendua 4, ostirala

Lehoien dantza. Grezia: jolasa eta odola


- Pertsiarrak berriro datozela esan du -oroitu zuen Urkik-. Rakelek esan diguna kontuan hartuta, eta hau Grezia Klasikoa edo antzeko zerbait bada, Kristoren aurreko 480 ingurua izan liteke. Lehenbizi, 490ean inbaditu zuten pertsiarrek, eta Maratoneko borrokan amaitu zen. 480ean, bigarrenez. Garai hartan…
- Honetan -zehaztu zion Olainek.
- Garai honetan, pertsiarrak Heladea, Grezia, inbaditzeko bidean ziren.
- Dira.
- Olain, serio ari naiz.
- Baita ni ere. Ez dakit non gauden, baina guretzat ha ez da iragana. Hemen gaude. Eta hobe dugu horrela pentsatzea: ez gara ikusle hutsak. Rakelek ez du oso garbi utzi, baina norbaitek lepoa moztuko baligu… benetan hilko ginateke, ezta? Zer, ez duzue erantzuten?

Rakel eta Antton errealitate birtualak aztertzen ari zirela, Antton hor nonbait gelditu zaigu galduta, itxuraz greziarren artean… Ez dira bere lagunak bila ibiliko zaizkion bakarrak ordea… Ethana Norman jainkoen pare dabilela esaten badizute, istorioa ulertzeko liburua irakurri beharko, ez? 

Grezia Klasikoko ohitura eta balioak ezagutzeko aukera emango digute multibidaiariek, baita Sofokles, Perikles, Eskilo, Temistokles eta musen eta erritu desberdinen berri izateko ere… Leonidas, Xerxes, 300 espartarrak… Guztiak bizitzeko beste modu baten ispilu dira. 

Historiaz eta abenturaz haratago, zein gogoeta iradokitzen dizkizu istorio honek? Olainen bila jarraitu nahi?

#50. DA!

Durangoko Azokak 50. edizioa zabaldu berri du gaur, goizeko 10:30etan puntuan.
Euskal Liburu eta Diskaren Azoka,
gure kulturaren erakuslehio garrantzitsua, garrantzitsuena ez bada… Abenduko asteburu luzea aprobetxatuz, horra urteak emandako uzta oparoa, egun hauetan 350 lan berri aurkeztuko baitira bertan.

Durangok lehen eguna Ikasleari zuzentzen dio, bertan kuxkuxean aritu, eta eskura duena ezagutzeko aukera eskeiniz; hala, ikasle uholdeak ematen dio hasiera bost eguneko kultur mozkorraldiari, 250 kultur ekitaldiren gozamena ia beste 250 erakustokiren sormen-zurrunbiloaz batzen baita.

Landa Gunean Azoka bai, baina Azokan hori baino gehiago topatuko duzu…
Gu Saguganbararaino heldu gara, ume eta gazteekiko transmisioa lantzeko gunera, gurasoek seme-alabekin batean hizkuntzarekin jolas egiteko eremura. Bertan, idazleen aurkezpenak, tailerrak eta bestelako ekintzak antolatzen dira Berbaroren eskutik, irakurketa aktiboa bultzatzeko. Gerturatuz gero, prestatu diguten ekitaldi mordoskaz gozatuko duzula ziur!



2015(e)ko abendua 3, osteguna

Eskale txikiak




Liburu honetan Francesco, Domenico eta Anaren historia kontatzen da. Gerrate ondorenean, mendiz inguratutako beren herrixka utzi beharrean gertatzen dira, eta bidaia luze bati ekiten diote Italian zehar.

Bidaia honetan era guztietako jendea ezagutuko dute hiru gaztetxoek: diruzaleak, berekoiak, besteri laguntzeko prest dagoen bihotz oneko jendea, euren lurrak defendatzearren borrokan dabiltzan nekazariak…


Lehio bat ireki eta bertatik gizartea ikustea bezala da liburu hau irakurtzea. Zerk hunkitu zaitu gehien?


2015(e)ko abendua 1, asteartea

Bat Pat. Hortzandi pirata

       Itsasoko Elezaharrik Ilunenak - Edgar Allan Poker.

"1666. urtea zen. Apirilaren 17ko gauean, Burezurraren uharte ondoko itsaso zabalean, Portwind parean, Hortzandi pirataren Kolpatua itsasontzi beldurgarria zokomiran zebilen. Mapa misteriotsu batek gidaturik, kapitaina altxor misteriotsu baten bila zihoan, hain zuzen leku mehatxagarri hartako uretan ezkutaturik omen zegoelako."


Maparen eta altxorraren kontuaz gain, elezaharrak osabak esandakoak baieztatzen zituen: itsasontzia hondoratu egin zen, eta hartaz eta tripulazioaz ez zen besterik ezer jakin. 
Arazo-usaina du kontu horrek guztiak, eta gaueko biztanle hegodun noble idazle batek uste baino pista gehiago bilduko ditu festa batean… eta abenturak idaztea baino, maitasun gutunak idaztea zailagoa dela deskubrituko du.

Bat Paten abentura honetan, zer da gehien gustatu zaizuna?

2015(e)ko azaroa 30, astelehena

Nikolas txikiren komeriak

Nikolasek, beste edozein mutikok bezala, bihurrikeriak egiten ditu; errietan egiten diote, gurasoen arteko liskarrak batzutan berak ere sortzen ditu… Bere lagunekin, beste edozein laguntaldek bezala, errekreo garaian liskar ugari izaten ditu… Burutazio xelebreak, barre txikia aterako dizutenak. Adibide gisa…. imagina gurasoak!

- Entzun, Nikolas, utzi negar-zotin horiek egiteari. Horrela ikasiko duzu beste baterako. Nik eman nizun dirua beharrezko ez zenuen zerbait erosten gastatu duzu eta berehala puskatu da. Arrazoizko izaten erakutsiko dizu horrek.
  Beno, ba, gaur arratsaldean benetan pozik izango dira amatxo eta aitatxo, ze izorratuta zegoen linterna Rufusi aldatu baitiot ederki asko jotzen duen txilibitu batengatik.

Zuri zein pasadizu gustatu zaizu gehien?

Nur eta altxorraren kutxa

Nur batera eta bestera dabil, bere gurasoei bidaian ibiltzea ikaragarri gustatzen baitzaie. Handitan, Nurek uharte batean biziko dela uste du, itsasoa gertu behar duelako, eta itsasoarekin batean, olatuak.
Handia izatean, bere surf-eskola propioa izan nahi du, baina aurrez surf txapeldun on, bikain, super-izugarria izan beharko du, jakina. Horregatik joaten da igandero surf-eskolara. Baina olaturik egongo ez denean idatziko du, idazle ere izan nahi duelako, amamaren antzera.

Istorioak gustatzen zaizkio, baina istorio politak behar dute izan, ez tristeak. Ogoñoko lamia bati buruzko istorio bat ezagutu dute, altxor bat ezkutatzen duen haitzulo bat ere bai… eta horrelakoetan egin behar den moduan, bila jardungo dira, lagunarteko abenturak biziz.
Ezagutzen al duzu lamiaren bat, edota herensugeren bat gordetzen duen haitzulorik? Zein aspaldiko istorio iritsi zaizkizu?

Ottoline eta kateme horia

Azala ikusita, haurrentzako liburua dirudi…
Mamia aztertzen hasita… gauza askori erreparatu behar ondorioren bat atera aurretik… Izan ere,
istorioa oso sinplea da, letrak, handiak, eta liburuak gainera marrazki mordoa du… Irakurtzen oso erraza.
Baina, litekeena da liburua eskuartean duzunean, tarte luze batez utzi nahi ez izatea:
ez da ipuin bat, luzeagoa baita; baina ez da eleberri bat, ez eleberri arrunta behintzat. Ilustrazioz josia, ez da liburu ilustratu bat gehiago, komiki kutsua ere baduelako. Gauza oso txikiei erreparatuz gero, beti topatuko duzu lehenago ikusia ez zenuen zerbait….
Chris Riddell idazle eta marrazkilariak tinta baliatzen du, eta marra mordoa, asko eta asko… eta tarteka kolore gorri pixka batez zipriztintzen du orri zuri-beltza.

Ottolinek koaderno batean idazten ditu bere plan guztiak, plan onak, eta Munroe jaunarekin uste baino antza handiagoa du… Akaso horregatik konpontzen dira biak hain ongi. Hitzak eta irudiak batera irakurtzera behartuko zaitu xelebrekeriaz jositako istorio honek.

2015(e)ko azaroa 29, igandea

Gatazka gela

Hamahiru urte. Gatazka gela. Salaketa bat, froga batzuk, errugabetasun deklarazioa, egia jakin beharra.
Bi irakasle zaintza lanetan, baina biak Gatazka gelatik kanpo: Hor arazoak ikastetxeko ikasleek konpontzen dituzte, helduek ez dute lekurik. Bitartekaritza lanetarako izendatuak izan diren ikasleek dute guztia argitzeko ardura.

- Konpontzen asmatuko dutela uste duzu? -galdetu zuen gizonak bat-batean.
- Bai -emakumeak irmo.
- Hau desberdina da. Ez da liskarra izan, irainen bat, edo adin horretako tontakeriengatiko borroka bat… Ia-ia kasu kriminala da. Beraientzat bai behintzat.
- Ez duzu konfidantzarik sisteman?
- Ui, sistema!
- Orain artean funtzionatu du. Eta hainbat urte egin dugu horrekin.
- Istilu txikiak ziren - ekin zion Alfredo Sanjuanek berriz-. Hau zera izango da… egiazko epaiketa. Hamar-hamaika urte besterik ez dute, hamahiru errepikatzaileren batek, eta zorioneko mugikor horrek hirurehun euro balio zuen, Jainkoarren!

Sierra i Fabrak, beste behin, nerabeen arazoak ditu hizpide eleberri eder honetan. Bizikidetza arazoak, irain eta beldurrak azaleratuko dira larunbat goiz batez Gatazka gelan, edozein egunetako jolas-ordua tarte laburregia baita hain arazo larria konpontzeko.

Veneziako misterioa

Aita idazlea da, eta famili giroan oporrak pasatzeko bidaia gidak idaztea da eskuartean duen azken enkargua. Zotz egin, eta amak aukeratuko du nora joan: Veneziara.

Davidek amets arraroak izaten ditu, eta hain amets desatseginak zergatik izaten dituen jakitea gustatuko litzaioke… Begi batzuk zelatatzen dutela amets egin du, eta inguruko edozein begiradak aztoratzen du, ezinbestean. Bere irudimenak ere badu eraginik, noski, eta konturatzerako, arte munduarekin zerikusirik duen iskanbila batean topatuko du bere burua.

Misterioak askoz ere misteriotsuago dira ezezagun zaigun hiri batean, ihauteritan, eta arte munduari lotuak badira. Veneziak hori guztia eskeintzen digu… Hiri ederra ezagutzeko istorio zirraragarria. Arte ikertzaileentzat leku aparta!

Daviden tokian bazeunde, nola jokatuko zenukeen?

2015(e)ko azaroa 28, larunbata

Pijama marradunaz jantzitako mutikoa


Brunok bederatzi urte ditu, eta aitaren lana dela eta, etxez aldatu beharrean dira, ia bapatean; ez du bere lagun onenak agurtzeko aukerarik izango, eta hori ez du batere gustuko.

Etxe berria arraro egiten zaio: polita dirudien arren, inguruan hesi ugari ditu… Maiz ikusten dira hesi horien tankerakoak, maiztasun handiagiz, baina zuk parean halakorik inoiz ez topatzea espero dugu, bihotzez.

Mutiko baten ikuspegia baliatzen duen kontalari honek, Bigarren Mundu Gerra hartu du hizpide, eta egia esan, oso hunkigarria bada ere, ez da ez haurrentzako istorio bat, ez eta gazteentzakoa ere… Helduek ulertuko dute zergatik, ziur. Istorioen eta Historiaren arteko mugak hain zail dira batzutan zehazten… 

Gizajo baten egunkaria III. Hauxe besterik ez nuen behar!

Gregen egunkariek arrakasta izan dute… Hau hirugarren alea da, aurrekoen oso antzekoa, baina beti ere desberdina. Gure egunak oso antzeko dira, baina beti gertatzen zaigu desberdin egiten dituzten xelebrekeriak, eta horiek dira Gregek biltzen dituenak. Bere inguruan gertatzen direnak, bere estiloan, bere umorez kontatuta.
Liburuak berez ez du argumenturik, ez dago istorio bat ulertu beharrik. Umore likatsua eta marrazki xinple baina xelebreak, denok ditugun anaien arteko liskar txoroak, edota institutuko lagunen arteko tirabirak…
Irakurtzea gehiegi gustatzen ez bazaizu, lagun ona duzu Greg! Erraz, oso erraz irakurriko duzu, eta barre egingo duzu gainera.

Bi pasarte hautatu ditut, barre dexente egin dudalako: 
obrak direla eta, autobusak ezin du bere zerbitzua betiko bidetik egin, eta Gregi bi astetan institutura oinez joatea egokitu zaio; horregatik alferkerian aritzeko desiratzen iristen da etxera. Larunbat batez, telebistaren aurrean jarri, eta urrutiko agintea mahaitxo gainean dagoela ohartuta… altxatzeko gogorik ez duenez, bere indarra, bai, indar mentala! baliatzen saiatu da urrutiko agintea beregana hegaz bereganatzeko, ordu laurden luzez, kontzentratuta… Baina ez du lortu.
Bestea… eskolarako egin duen 4 orritako txinpantzeari buruzko lana… Wikipedian bilatuta ere topatuko ez dituzun datuak eskuratuko dizkizu Gregek… txinpantzea, labur esanda, txinpan bat dela ba al dakizu?
Zein dira zuri gehien gustatu zaizkizun pasadizuak?

Nur eta magia kanpamendua

Uda da, eta Nur, beste gaztetxo asko bezala, kanpamentu batera joango da astebete pasa… Batzuk ingles kanpamentutara joaten dira, beste batzuk futbol kanpamentutara… aurten Nurek magia kanpamentua aukeratu du. 
Baserri batean, Oliver eta Txagu Maguk zortzi magia ikasle hartu dituzte astebetez: trikimailuak egiten irakatsiko diete, eta magiaz gozatzeko egunak izango dira… 
Baina, honezkero ezagutzen duzue Nur… Saltsera xamarra izateaz gain, jakinmin handiko neskatoa dugu, eta baita irudimen handikoa ere… Baserrian hainbat sekretu gordetzen dituztela iritzita, Detektibeen Txipiroi kluba sortuko du, eta misterioak argitu arte ez du atsedenik hartuko.
Magoek zer ezkutatzen duten jakin nahi?

2015(e)ko azaroa 27, ostirala

Printze txikia

Maitasuna, Adiskidetasuna, Bizitzaren zentzua… Gizakion izakeraz eta jokaerez egiten digu gogoeta Printze Txikiak, gure gizartearen kritika latza, nahiz eta baliatzen dituen adibideak ederrak izan, poetikoak, eta marrazki goxoz lagunduak… Malenkoniaz beteriko lana.

Haur baten begiez begiratuta, gure inguruan gertatzen diren hamaika gauza ulergaitz dira… eta Printze Txikiak benetan garrantzitsu dena ezin ikus dezakegula erakutsi nahi digu, edertasuna barnean dagoela, norberak deskubritu zain… Irudimena beharrezko zaigu zeregin horretan, ezinbestean. 

video

Haur eta gazte literaturan klasiko bilakatu bada ere, Printze txikia Literatura Unibertsalaren ondare da, gazte eta helduen gozamenerako. 
Antzerkira, marrazki bizidunetara, zinemara zein musika obratara moldatu bada, hunkigarria delako da, zalantzarik gabe.
Haur izanik irakurri baduzu, hemendik urte batzutara berrirakurtzeko gonbidapena luzatuko dizugu… Zure inguruko helduen artean galdetu ea irakurria duten, eta haien inpresioak jasoko al zenizkiguke?

2015(e)ko azaroa 25, asteazkena

Nur eta irlandar gnomoa

Finni erraldoien marrazkiek barregura ematen diote, gnomoak irudikatzeko oso modu xelebrea dutelako. Horregatik hain juxtu, Nurrek oso argi du: lagun berriak ez dira beti etxean aurkezteko modukoak.

Amatxo ezer esan gabe sartu da gelan, eta sekulako ikara eman die biei. Finn geldi-geldi geratu da, estatua bat balitz bezala, eta Nurrek panpinen etxeko panpina guztiak jasotzen ditu, bezperan lurrean utzita baitzeuzkan.
- Panpinei ipuin bat kontatzen ari nintzaien…
Amatxo ondora etortzen da, eta Finn ikusten du; hura arnasa hartzen ere ez da ausartzen ia-ia.
- Hau ikusi gabe neukan orain arte… Irlandar gnomoen moduan dago jantzita…
A zer beldurra!
Hartu eta arreta handiz aztertzen du.
- Bigun-biguna da -esaten du sabela zapalduz.
Finni sekulako barregura sartzen zaio, baina eutsi egin behar dio, eta begiak zabal-zabalik mantentzen ditu.
- Atzo aurkitu nuen -esaten dio Nurrek amari, bestelako azalpenik eman beharrik ez izateko-. Emango?
Sekretuak gordetzea hain da zaila…

Eta zuk, nola irudikatu izan dituzu gnomo eta iratxoak?

2015(e)ko azaroa 20, ostirala

Jara

Jarak 13 urte ditu, eta goiz batez, neskato izateari utzi dio. Gorputza aldatzen ari zaio, eta bere buruhausteak ez dira haur batek lituzkeenak… Gurasoek, haiek ere 13 urte izan zituztela dioten arren, ahaztuta dituztela zin egingo luke Jarak: ez dute deus ulertzen, eta bere arazoak haiek konpon ditzaketela uste badute, oker dabiltza.
Ihintza du lagun mina, eta harekin batera biziko ditu bizitzako esperientzia zirraragarrienak.

Neskentzako liburu bat? Egia esan, ez… Ez dago neskentzako ala mutilentzako libururik: istorioa gustoko izatea da kontua. Baina 13 urteko neska bat da Jasone Osororen protagonista,
Jara, neska berezia, tatuajea gurasoei baimenik eskatu gabe egin zuena. Hilekoa zeukana. Asteko protagonista izan zena eskolan… Batzutan bere espazioa komuneko pareten artean itxita aldarrikatzen zuena… Hainbeste aldaketaren anabasean galduta zebilena…
Zein izan da gehien gustatu zaizun pasartea?

Mila galdera, hamaika zalantza… Jarak izango ditu bizipen gehiago, eta bidaide nahi zaitu… Jara Live ezagutzen?

2015(e)ko azaroa 18, asteazkena

Aberastu naiz azkenean!

Oriolek etxean zerbait eskatzen duenean, ez dutela horretarako dirurik erantzuten diote… Horregatik erabaki du ahal bezain laster aberastu behar duela, behar-beharrezkoak dituen gauza guztiak berak erosi ahal izateko (zerrendan bideo kontsola, arrain eta animalia haragijalez betetako arrainontzia eta Irakasle Eroaren laborategia dauzka… adibidez). Astea amaitu aurretik aberastea lortzen badu, askoz hobe!

Negozioen mundua ulertzea kostako zaio Orioli… Astea aurrera joan, eta lehen saiakerak porrot galantak izango dira: txakur-txikirik irabazi ez, eta gainera, ikastetxeko zuzendariaren aulkiaren faktura iritsiko zaie etxera, udaltzain baten zapaten gainean botaka egingo du, eta aitaren garagardoen hozkailua konfiskatuko dizkiote… Hala ere, ez du etsiko, eta bere gaitasun zientifikoa ere martxan jarriko du aberats bihurtzeko saiakera horretan.

Bere negozioak zein izan diren? Irakurri, irakurri… Ea ideia guztietan onena zein iruditzen zaizun! Liburuko marrazkiekin ere barre egingo duzu, ziur!

2015(e)ko azaroa 9, astelehena

Leize-zuloko misterioa

Aitonak bere ezagutzak transmititu nahi dizkio bilobari, leizea ezagutu eta maitatu dezan, eta aldi berean zor zaion begirunea izan diezaion…

Horixe da Iñaki Zubeldiak transmititu nahi digun mezua. Arrikrutzeko kobazuloan orduak galduta eman zituen Jesus Manuel Marotorekin batean 1966an, eta lehoi baten hezurdurarekin egin zuten topo. 

Aurkikuntza bitxia bezain interesgarria, istorio honetako misterioaren oinarria… 

Bide batez, oraindik paraje horiek ezagutzen ez badituzue, gerturatu zaitezte… Lurrazpiko edertasuna mundiala da!

2015(e)ko azaroa 6, ostirala

Bideokontsolek Aliziaren eskutik ikasi dute euskara

Aliceren ibaiak da jokoaren izena, euskaraz kontsola batean joka daitekeen lehena. Bilboko Delirium Studios enpresak sortu du, lehenago ingelesez eta gaztelaniaz sortutakoen euskarazko bertsioa. 
Bertsio hedatua iOS eta Android mugikorretarako dago eskuragarri, urte amaierarako PC-tarako izango da prest, eta benetan berezi egiten duena, Wii U kontsolarako, ezein kontsolatarako, euskarazko lehen jokua da.
Grafikoak Ane Pikaza ilustratzailearenak dira, eta soinu banda, berriz, Vetusta Morlarena. Abentura grafiko aparta.

Literaturaren eskutik heldu da euskara bideo-jokoetara…
Alizia… lurralde miresgarrietan...

Zonbi mutanteen gaua - Zonbi gunea III

Zonbiek Maxi hozka egin dioten arren, ez da zonbi bilakatu… Liottoko protokoloan jasotako proba guztiak egin dizkiote, eta ez, itxuraz, inmunea da.
Liottoko protokoloa irakurri eta horrekin barre egiten ez baduzu, agian zu zeu zara zonbia… Hala bada, Heriovillen besoak zabalik hartuko zaituzte, Erromeria gauean bereziki. 
ZA koadrilako kideek abentura berria biziko dute Zonbi mutanteen gauean.

2015(e)ko azaroa 3, asteartea

Galtzerdi suizida



Anaia eta ni beti izan gara oso desberdinak! Horixe gertatzen da biki guztiekin, jendeak uste duela berdin-berdinak izan behar dutela barrutik ere, kanpotik diren bezala, eta ez. Ez da horrela gertatzen.

Bikirik baduzu, Augusto erraz ulertuko duzu... edo ez... Auskalo! Baina primeran pasako duzula, hori ziur! Nola uztartu basoetako suge beltz beldurgarriak eta gladiadoreak? Izaki arraro bat zarela esango balizute, zer pentsatuko zenuke? Mariasun Landaren irudimenak ez du mugarik… 

2015(e)ko urria 29, osteguna

Zonbia San Mamesen...

Halloween arrotza den ala ez gure artean, ez du hori eztabaidatzen hasteak merezi…

Zonbi istorio bat dakargu gaurkoan, Bilboko kaleetan belarri bila dabilen haragi-ustel pertsonaia xelebrea…

Ezin imajina ditzakezun pasadizuak biziko dituzu liburu honetan, eta Fernando Morillok egindako deskribapenak hitzetan ezezik, irudikatzeko saiakera eginez gero, barre dexente egingo duzu ziur.

Making of-a duen beste libururik ezagutzen al duzu?

Alboko irudian klikatu, eta liburuaren lehen orriak eskuratuko dituzu, baita idazleari egindako elkarrizketa bat ere.

Izu-ikarak barre bilakatzeko garaia heldu zaio Bilbori.

Ditxosozko ditxolaria

Mikel 12 urteko ditxolaria da, eta gauzak errimaz esan ohi ditu.

Klaseko liderra omen zenak hauxe bota zidan:
- Zu, bertsoLARRI! Ezetz errimatu hitz hau: MO-KOR-DO-A!
      Eta irakaslea zur eta lur gelditu zen une berean, Mikelek hau erantzun:
Nire erantzuna HOR DOA,
kontsolatzeko mutil LERDOA.
Badakizu non den MOKORDOA?
ipurdian daukazu MORDOA!!!!

Parre pixka bat egingo duzu errimen artean...
denak ezin izan bertsolari baina, ditxolari izatea dibertigarri izan daiteke.
Egingo al zenuke, irakurri eta gero,
honen inguruan komentario bat,
ditxolari baten moduan?

2015(e)ko urria 27, asteartea

Xerezaderen artxiboa

Audioliburuak kontu berria direla pentsatzen baduzu, oker zabiltza ia ziur… Talde batentzat ozen irakurtzea betidanikoa da: monastegietan hala egiten zuten, eta baita etxeko sutondoan ere; sukaldeetan irrati-nobelak entzuten ziren garaietara ere jo genezake, edota haur gineneko oroitzapen goxoetara… Ahotsak berezi egiten ditu letra idatziak, eta literatura maitatzeko modu bilakatzen da. 
Xerezaderen artxiboan ipuinak gordetzen dira, helduentzako ipuinak bereziki… Xerezade ipuin kontalari aparta izan zelako, kalifa ipuinen amaraunean harrapatu eta Heriori ihes egitea lortu zuelako, irudimenez jantzia ausart. Baina harribitxi horien artean bi topatu ditugu, haur eta ez hain-haurrentzat atonduak… 
Natalie Pudaloven ilustrazioa.
       
Itzelhandien lo kuluxka 
eta        Jack eta Heriotza.

      Belarrien gozamenerako, horra...



2015(e)ko urria 25, igandea

Audioliburuak eskura Udal liburutegien sarean

Audioliburuak zer diren jakingo duzu ezta? Batzutan irakurtzea kosta zaigula esaten dugu, baina… 
Eta norbaitek istorioak kontatuko balizkigu? 
Horixe dira audioliburuak, istorioak entzungai. Udal Liburutegiek eskeintza geroz eta zabalagoa dute; Legazpiko liburutegiak mailegutzak nola funtzionatzen duen azaltzen digu aurkezpen txukun honetan.
Liburutegiak ez dira aintzinako kontua, haiek ere berritzen dira...

2015(e)ko urria 22, osteguna

Garoa Kultur Lab

Arrazoi duzu… Garoa's Totebagak aipatu… eta oraindik ez dugu Garoari buruz hitz egin…
Ez da hau Liburudenden publizitatea egiteko lekua… baina Garoa ez da liburudenda bat, ez behintzat liburudenda soil bat. Garoa Kultur Lab, kultura, letrak, artea, teknologia berriak eta eztabaida uztartu nahi dituen Kultur Esperimentazio Gunea da, bilera klandestinoetarako eta irakurle klubetarako txoko aparta. Zarautzen eta Donostian esporen gustu literarioaz fidatzen den irakurle ororen esperientzia literarioa aberastea eginkizun bakartzat duen parajea da Garoa. Haiek baino hobeto, ezin inork definitu.

2015(e)ko urria 21, asteazkena

Zure Liburutegia noiz bisitatu duzu azkenekoz?


Norberak etxean liburuak altxor gisa gorde ditzake… Baina oraindik deskubritzeko zain dituzu asko eta asko Liburutegian. Bertaratu, eta azalak ikusi, kuxkuxeatu, liburuak zabaltzeko lotsa galdu… Zail egiten da Liburutegitik esku-hutsik irtetea.

Urriaren 24a Liburutegiaren eguna da.
Gertu duzu bat, ziur. 
Bixita ezazu, eta Aliziaren lurralde miresgarrian bezala, ate batean atzean mundu berrietarako ateak zabalduko zaizkizu oharkabean.

Garoa's Totebag election

Juxtuan… Baina oraindik garaiz!
Garoak Zarautz eta Donostiako liburudendetarako Totebag bat nahi du, eta proposamen originalen bila dabiltza. Totebagak mezu ugari zabaltzeko baliatzen dira: batetik, berrerabiltzeko kontzientzia pizteko, eta bestetik, hitzez, irudiz eta sormenez adieraz dezakegun edozer plazaratzeko.

Parte hartu nahi duzuenontzako, baldintza gutxi:
- Gaia, ezinbestean… Liburuak!
- Artxibo mota: .jpg, eta gehienez 3 kolore erabil ditzakezu.
- Pertsonako 2 diseinu onartuko dira.
- Saria: paperezko kontzertuetarako hiruhileko bonoa + 50 euro liburutan.
                     - Epea: Urriak 26.

Bai, juxtu-juxtu, baina asteburua zukutu, eta akaso Zarautz eta Donostiako kaleetan barrena zuk diseinatutako poltsak ikusiko dituzu ibiltari.
Zure proposamena donostia@egaroa.com era bidali, datorren astelehena baino lehen!

2015(e)ko urria 18, igandea

Ipupomamua?

Bernardo Atxagak asmatu zuen hitz arraro hau…
Zer esan nahi duen? Kuku gordeka dabilen mamu xelebre horren gainean klik egin, eta bertan topatuko duzu erantzuna.
Gaurko izan ez arren… online ikusteko aukera badugulako ekarri nahi dugu gogora: etb -rako esteka honetan sakatu, eta bilatu leihoan ipupomamua idazten baduzu, hortxe dituzu, nahieran. Haur eta gazte literaturaz gozatzeko aukera paregabea.

2015(e)ko urria 16, ostirala

Errima errebeldeak

Barre egin nahi?
Bila itzazu Roald Dahlen Errima errebeldeak, eta ez zaizu damutuko!

Mari Errauskinek dantzaldian bazterrak nahastuko ditu, Hiru txerritxoek imagina ezin duzun laguntzailea izango dute… eta Otsoak… Otsoak gorriak ikusiko ditu.

Zazpi ipuinak ezagutzen dituzu, ziur, baina bertsio errimatu honek aho bete hortz utziko zaitu: heavya da, ironiaz idatzia, bihurria… guztia hankaz gora utzita gustora moldatua. Quentin Blake marrazkilariak orrialde osoko marrazkiez lagundu du, bikain, eta Joseba Santxoren itzulpena itzela da.

Irakurri, errezitatu,
...eta akaso rapeatzera ere ausartuko zara.

Zein izan da bertsioetan gehien gustatu zaizuna?


2015(e)ko urria 12, astelehena

H gabe


Sustrai Colina?
Idazle?
Baina, ez al da ba bertsolaria?

Ba... bai eta bai, bertsolari gazte aski ezaguna,
idazle bilakatu zaigu enkarguz.
Bertsolaritza bapatekoa da, bizia, xaxatia… eta halakoxea da ere bere lehen liburu hau: Beti oilarturik dabilen Keparekin nazkatuta, norbaitek pintada bat egin du ikastetxeko horman. Aztarna garbia utzi du ordea… Ortografia gehixeago zaindu izan balu… 

Irakurri, eta zure pasarterik gustokoena zein den esango bazenigu?